Nesta IV Semana Cultural tivemos a sorte de contar, unha vez máis, coa visita de Anxo Fariña. Como sempre, bastou a súa presenza para que os nenos e nenas fosen quen de facer uns incribles debuxos. Aquí vai unha pequena mostra: (Se queres ver as fotos detidamente, pon o cursor enriba da foto e preme en pausa)
Manifestación a prol do galego. Dicir que eramos miles, tampouco é dicir moito, pero nós, que estivemos alí, somos testemuñas de que eramos moitos miles, malia o mal tempo; porque, claro, o tempo solidarizouse coa nosa lingua doente. Poderiamos poñernos sentimentais é recurrir á personificación -tantas veces empregada- de que "o ceo choraba bágoas de tristeza", mais deixémonos de sentimentalismos e esixamos o que nos pertence.
Pero que bos contacontos tiñamos no "cole", e nós sen sabelo! Hai que agradecer a estes nenos e nenas o tempo que dedicaron aos ensaios e a preparar os textos na casa. Pronto veredes as fotos, de momento podedes ver a pequeniña montaxe que se fixo coas fermosas ilustracións do conto de "Cirano". Xa sabedes que agora está na biblioteca, tamén atoparedes alí os outros dous contos que vos contamos:"Orellas de bolboreta" e "Quen levou a Lúa", así que... a por eles!!!
"Cirano", un home moi especial e bondadoso.
"Quen levou a Lúa?", descobre o misterio da máxica desaparición na biblioteca. Se alguén considera que este vídeo -que se fixo cunha finalidade educativa- atenta contra a propiedade intelectual, póñase en contacto con nós e será retirado de inmediato.
Nesta IV Semana Cultural imos ter varios actos que esperamos vos gusten a todos e todas. O calendario é o seguinte:
Luns, 11: Cine en galego (1º e 3º ciclo)
Martes, 12: Cine en Galego (2º ciclo) e a obra "O Libro Máxico" de Migallas.
Mércores, 13: Contacontos (os nenos e nenas de 6º van contarnos uns contos moi fermosos, e ao mesmo tempo poderemos ver as ilustracións, que son moi "chulas".
Xoves, 14: Anxo Fariña visitaranos de novo, que nos ensinará nesta ocasión?
Venres, 15: Teatro dos nenos e nenas de 2º, homenaxe a Ramón Piñeiro (Parolando sobre Ramón Piñeiro e vídeo), entrega de premios do Certame Literario e Contos en cantos.
Anxo Fariña, ademais de ser ilustrador, é autor de libros como "Don Quixote e Breogán" ou "Os Megatoxos", de seguro que xa os coñecedes, porque... están na biblioteca!
Sen ánimo de ofender a ninguén, invitámosvos a cantar este "rap" que ten como letra un poema de Celso Emilio Ferreiro, autor moi importante da nosa literatura que escribiu libros tan emocionantes como "Longa noite de pedra" ou "O soño sulagado".
DEITADO FRENTE AO MAR...
Lingua proletaria do meu pobo eu faloa porque si, porque quero, porque me gusta, me peta e dame a gaña, porque me sae de dentro, alá do fondo dunha tristura aceda que me abrangue ao ver tantos patufos desleigados, pequenos mequetrefes sen raíces que ao pór a garabata xa non saben afirmarse no amor dos devanceiros, falar a a fala nai, a fala dos avós que temos mortos, e ser, co rostro erguido, mariñeiros, labregos da linguaxe, remo e arado, proa e rella sempre.
Eu faloa porque si, porque me gusta e quero estar cos meus, coa xente miña, preto dos homes bos que sofren longo unha historia contada noutra lingua.
Non falo prós soberbios, non falo prós ruíns e poderosos, non falo prós finchados, non falo prós baleiros , non falo prós estupidos, que falo prós que aguantan rexamente mentiras e inxusticias de cotío; prós que súan e choran un pranto cotián de bolboretas, de lume e vento sobre os ollos núos. Eu non quero arredar as miñas verbas de todo os que sofren neste mundo. E ti vives no mundo, (terra miña, berce da miña estirpe,) Galicia, doce mágoa das Españas, deitada rente ao mar, ise camiño...
No seguinte enlace tendes unha liña do tempo virtual, onde se poden ver claramente os acontecementos máis importantes da vida e obra de Ramón Piñeiro. Ademais, tamén tendes un vídeo onde un neno nos narra a súa vida (poderedes ver a casa onde naceu, a súa irmá e moitas personalidades importantes da cultura galega). Preme na foto.
O enlace que tendes a continuación é moi interesante, nel podedes atopar moitos libros de autores galegos, como por exemplo, Rosalía de Castro, Ramón Piñeiro (hai unha cronobiografía deste autor moi completa nun dos seus cadernos). Tamén hai gravacións sonoras dalgunhas obras de Rosalía de Castro (fonoteca), manuscritos antigos (facsímiles), etc. Para que te sexa máis fácil utiliza o buscador. http://www.letrasgalegas.org/
Hoxe, Día Internacional do Libro, tivemos a presentación do conto viaxeiro, que foi realizado entre o noso alumnado e o do C.E.I.P. de Carballal. Ademais de ver o vídeo, contamos cuns moi bos narradores, que nos relataron as peripecias que viviron os catro protagonistas para axudar a ese osiño desamparado.
Aquí tendes a webquest na que podedes traballar para coñecer a figura de Ramón piñeiro. Lede atentemente todos os apartados e buscade a información nos enlaces que vos propoñemos.
Xa temos rematado un novo conto, un conto no que non faltan bos sentimentos e moitas sorpresas. Non vos impacientedes, a súa presentación terá lugar o 23 de abril (Día internacional do Libro), así poderedes saber cal é o desenlace e admirar os fermosos debuxos que fixestes.
Nesta Semana Cultural imos ter, como de costume, varios actos entre os días 11 e 15 de maio para celebrar as Letras Galegas. Contaremos unha vez máis, porque xa nos visitou no ano 2006 e 2007, coa visita do escritor e ilustrador Anxo Fariña. Ademais tamén teremos teatro a cargo dos nenos e nenas de 2º -que nos sorprenderán coa representación dun conto popular-, e da compañía chamada "Migallas" (seguro que a coñecedes, non?), que actuará o día 12 de maio para o alumnado do noso centro e o de Carballal. O título da obra é "O Libro Máxico".
V CERTAME LITERARIO C.E.I.P. MESTRE MARTÍNEZ ALONSO Ide pensando qué conto ou qué poema queredes escribir para presentar a este V Certame Literario, como sempre haberá premios que serán entregados na Semana Cultural 2009 (maio). Anímate, talvez ti sexas un dos gañadores ou gañadoras!!
"AS PALABRAS VIAXAN NAS CARTAS, DEIXA QUE ELASTE LEVEN A TI POLO MUNDO DA FANTASÍA E DAS EMOCIÓNS."
Na dirección que aparece a continuación, poderás escoitar fermosas cancións que teñen unha letra moi especial, xa que son poemas en galego, como por exemplo, "Chove en Santiago" de Federico García Lorca,"Vogar" de María Mariño, e mesmo o himno galego "Os Pinos" de Eduardo Pondal. Tamén poderás ler moitos poemas máis, compostos dende a Idade Media até os nosos días. Preme nos triángulos para ver a letra.
Este ano o homenaxeado neste día vai ser Ramón Piñeiro López (Láncara 1915-Santiago 1990); se queres saber algo máis sobre este gran defensor da nosa cultura e, particularmente, da nosa lingua, preme na foto.
Como todos os anos, no Samaín, fíxose unha exposición de cabazas que, por falta de espazo, colocamos nos chanzos das escaleiras. Que susto nos deron algunhas cando subiamos, e non digamos o esqueleto ben ataviado co seu chándal que nos esperaba no corredor!!
Velaquí as fotos dos murais que se fixeron para celebrar o Samaín e o Magosto deste ano 2008. Dende agora xa coñecemos moi ben a historia desta festa celta: o Samaín.
Que bonitas rimas e refráns podemos ler nestas castañiñas!!
O día 14 de novembro celebramos o Magosto e algúns comeron castañas a fartar.
Esta é unha pequena mostra dalgunhas das actividades do curso pasado, mais non aparecen as fotos das saídas e doutras actividades realizadas, como por exemplo, as fotos do Meco. Pronto poderedes velas noutra presentación.
Este outono chegou cargado de palabras, das vosas palabras, esas que vos regalaron os vosos familiares. Tivemos a presentación do libro o día 14 de novembro, e a fermosa "Fada das Palabras Regaladas e os Agarimos" díxonos que estes son os verdadeiros agasallos, moito máis importantes cós que custan cartos. Tamén se lles entregou un exemplar aos nenos e nenas do C.E.I.P. Carballal, cos que compartimos o centro durante este curso, ademais das palabras "COMPARTIR" e "AMIZADE". Aquí tendes o vídeo que se fixo con algunhas das palabras que aparecen no libro, o cal puidestes ver ese mesmo día proxectado co canón; para ler os significados destas palabras contamos con dous estupendos narradores, Ailén e Néstor.
Para rematar todos e todas limos as palabras que aparecen neste vídeo; pero para lelas todas, haberá que mirar o libro que está na nosa biblioteca.
E o acto continuou, deseguido puxémonos a cantar "Corre, corre, cabaciña", con bis incluído.
Este ano o noso conto, que xa é o terceiro, titúlase "Laura, a serea da Illa Vermella", este é un conto cheo de solidariedade, amizade e ...amor. Aquí tendes o vídeo que fixo o E.N. D.L. do centro cos debuxos e o texto que entre todos e todas creastes. Xa sabedes, porque todos e todas levastes un conto para a vosas casas, que o texto é máis longo; pero aquí está un pouco reducido para que sexa máis dinámico e para que a súa lectura sexa máis doada.
O Día do Libro puidemos ver co canón a presentación do noso conto, agora aquí o tendes para lelo cando queirades.
Erro: Cando no texto aparece: "Cando Laura chega á illa descubre que os sereos e as sereas están enfermos"..., debería dicir descobre.
Somos o Equipo de Dinamización da Lingua Galega do C.E.I.P. Mestre Martínez Alonso de
Mos, un grupiño de xente, que xunto con todo o profesorado do "cole", intenta darlle un pulo ao galego e a nosa cultura.
DESPEDIDA E RECOMENDACIÓNS DE VERÁN
-
E case sen decatarnos, chegamos ao final dun novo curso. Ao longo destes
meses, a biblioteca escolar foi moito máis ca un espazo cheo de libros. Foi
un l...
RATIÑO E RATIÑA XA ESTÁN AQUÍ DE NOVO!
-
Ola a todos!
Xa estamos aquí de novo e traemos moitas novas que contarvos!
Para empezar e por se non o sabedes (que algún de vos é moi despistado) xa
está...
Se queres colaborar con nós en atopar a orixe dos topónimos do noso concello, só tes que apuntar a procedencia do topónimo, mesmo daqueles que xa non se usan ou foron substituídos. Poden ser nomes de lugares, parroquias, muíños, camiños...
IV CERTAME LITERARIO
Este ano houbo moita participación e non foi doado elixir entre tantos traballos, pero só algúns podían gañar. Os seus traballos serán publicados, como xa é costume, no xornal Louro.
Conto Viaxeiro 2008
O novo conto xa está en marcha!! Douvos un anticipo, este ano está relacionado co mar e con moitos e orixinais persoaxes. A ver ónde nos leva a imaxinación dos nosos alumnos e alumnas!!
Conto viaxeiro 2008
O noso novo conto xa rematou e pronto vos colgarei o vídeo que puidemos ver o Día Internacional do Libro. Este ano xa sabedes que esta caracterizado polo romanticismo e o altruísmo, é dicir, a axuda incondicional.
Letras Galegas 2008
Este ano o homenaxeado será Xosé María Álvarez Blázquez, persoeiro da nosa cultura que traballou a prol da edición de obras en galego. Tamén foi escritor e poeta.
SEMANA CULTURAL 2008
Na Semana Cultural 2008 contamos con dous invitados moi importantes dentro do ámbito cultural e sobre todo literario: Abraham Carreiro e Fina Casalderrey. O primeiro amosoulles aos máis pequenos cómo podemos ilustrar os contos e a devandita autora comentou os seus libros co alumnado de 2º e 3º ciclo. Os noso alumnado de 5º e 6º visitaron o xornal "Faro de Vigo" para coñecer de cerca unha actividade moi relacionada co autor homenaxeado, é dicir, a edición. Tivemos tamén, na súa terceira edición, "Cine en Galego"; entrega de premios do IV Certame Literario; teatro a cargo dos nenos de 1º A e B...
Visita de Fina Casalderrey
Na nosa Semana Cultual 2008 o alumnado do 2º e 3º ciclo poderán coñecer en persoa a Fina Casalderrey. Con ela falarán dos seus libros e das súas inquedanzas, proxectos... e concretamente dos seus libros titulados: "Quen me quere adoptar?", "A lagoa das nenas mudas"; "Chamizo" e "Asústaste, Merche" que lerán os nenos e nenas de 3º, 4º, 5º e 6º nivel respectivamente.
As Estrelas da Amizade
Se queredes ver o noso conto do último ano " As Estrelas da Amizade" só tendes que pasar pola biblioteca; pero se queredes un aperitivo, aquí vai unha chea de imaxes que acompañan ao texto. Esta montaxe esta feita cos vosos debuxos, espero que vos guste. O Día do Libro celebrarase a súa presentación na biblioteca, onde haberá moitas estreliñas!
Día das Letras Galegas 2007
O ano pasado a homenaxeada neste día foi María Mariño, unha muller moi estraña, pero cunha grande sensibilidade poética. Aquí presentamos a esta poeta cunha reportaxe fotográfica na que abondan moitas estampas do Courel, terra na que viviu moitos anos co seu marido e onde coñeceu ao seu gran amigo Uxío Novoneyra.
Visita de autores na Semana Cultural 2007
O ano pasado tivemos o honor de contar coa visita do ilustrador Anxo Fariña, que nos amosou como todos somos quen de debuxar a don Quixote, e tamén do recoñecido escritor que acaba de acadar un novo premio, Antonio García Teijeiro, autor que nos ensinou a pensar co corazón.
As pedras de Mos falan galego
Este curso imos de roteiro, polo menos os nenos e nenas do 2º e 3º ciclo, xa que para os máis pequenos pode ser moi canso. Tentaremos descubrir eses caprichos da natureza: pedras que ata poden falar en galego!, se sabemos escoitar. Para poder levar a cabo esta actividade contaremos co asesoramento da asociación Mosqueo, axuda que agradecemos de antemán. Así que a poñerse en forma!!!
O Libro das Palabras Regaladas
O Libro das Palabras Regaladas vén con retraso, pero non deixaremos de facelo. Como xa se dixo, de entre todas elas vaise escoller a palabra máis fermosa, e o neno ou nena que a trouxo recibirá un pequeno agasallo. A presentación do libro e a entrega do agasallo terá lugar o día da presentación do noso conto viaxeiro. Agardade ata entón!!!! Aínda que vos adianto que hai palabras moi fermosas coma "candea", "faísca"...
Certame Literario
Pronto teremos noticias do IV Certame Literario, no que esperamos que haxa moita participación. A súa presentación será o 6 de febreiro.
Xa chega o "Entroido"
Este ano o Entroido vén cediño, aqui tendes colgada a sesión de fotos dos entroidos tradicionais de Ourense, que fixemos o curso pasado. Gozade co colorido de peliqueiros, cigarróns, pantallas, vergalleiros ... Ademais tendes os carteis que se fixeron sobre estes pesonaxes. Traballo custou a profes e alumnos, pero ben bonitos que quedaron!
